Tornado

E Tornado (vo spanisch tornar, uf dt. „umcheere, drülle“, us em latiinische tornare, mit dr gliiche Bedütig^[1]), au Wind- oder Wasserhose, isch e chliirüümige Luftwirbel in dr Ärdatmosfääre, won e fast sänkrächti Drüllaggse het und mit ere konvektive Bewölkig (Cumulus und Cumulonimbus) zämmehängt. Das underschäidet en vo de Staubdüüfel. Dr Wirbel goot vom Boode bis zur Undergränze vo de Wulke. Die Definizioon goot uf e Alfred Wegener (1917) zrugg und isch in dere Form au hüte no allgemäin gültig.

D Begriff Wind- und Wasserhose (ängl.: Waterspout) bezäichne im dütschen Sproochruum e Tornado über Land beziejigswiis über gröössere Wasserflechene (Meer, groossi Binnensee).

Es git kä Underschiid zwüsche Windhose und Tornado, weder im Bezug uf iiri füsikalischi Natur no in Bezug uf iiri Sterki.

1. ↑ Friedrich Kluge, Elmar Seebold: Etymologisches Wörterbuch der deutschen Sprache, 24. Band. Walter de Gruyter, Berlin/New York 2001, ISBN 978-3-11-017473-1, Seite 921.